انا
المصري كريم العنصرين 

 كتب د. حماده العنتبلي

انا مصري زي ملايين من المصريين اللي كانوا بيتابعوا بكل فخر وعزة وسعادة
غامرة بلدهم وهي بتبهر العالم .. كانت الرحلة الذهبية لنقل مومياوات ملوك وملكات
مصر حديث العالم ومحط انظارهم .. اد ايه بلادنا جميلة بس ياريت نحافظ على الصورة
المبهجة دي .. اد ايه سعيد وانا شايف كل عربي بيتكلم بفخر عن مشهد مهيب ورائع
عملته مصر .. اد ايه فخور والعالم كله بيقول مصر .. اد ايه كان رائع استقبال
الرئيس المصري لمومياوات ملوك وملكات مصر في متحف الحضارة .. اد ايه وزير الآثار كان رائع وهو بيشرح مكونات المتحف للرئيس وللعالم .. اد ايه كل تفصيلة في الحفلة
كانت رائعة .. فنانين .. اوركسترا .. مطربين .. موسيقى .. اخراج .. أطفال عينيهم
بتلمع بالفخر والعزة والحلم ببكرة أفضل .. كل شيء حلو أوي .. مصر البهية .. مصر
الجميلة .. والمصري لما يبدع .. بالأمس القريب كان عندنا ابداع صنعه مهندسين وعمال
في مواجهة ازمة كان العالم كله منتظر يشوف مصر هتعمل ايه والمسرح كان قناة السويس
شريان الحياة للعالم عرفنا العالم وقتها أن القناة شريان حياة وأن مصر محور العالم
وبدونها تقف حركة التجارة العالمية وفي نفس الوقت أظهرنا مدى براعة وقدرة المهندس
المصري.. وكانت الإجابة مصر والمصريين
رمز كل انجاز واعجاز .. وبالأمس وقف
العالم ليتابع مصر وهي تبدع والمسرح كان متحف الحضارة وميدان التحرير وشوارع مصر
.. ايوة انا مصري .. فخور ببلدي .. والمصريين تركيبة من البشر لا ولن تتكرر لن تجد
شعب في العالم يحب بلده مثل المصريين .. بنزعل من بلدنا اه ولكن لا نتحمل ان
ينتقدها احد .. لو احتاجتنا بتلاقينا فداها .. تركيبة لن يفهمها الا المصريين ..
ممكن تلاقيني بكرة بانتقدها وباليل بافتخر بيها .. احنا كده المصريين كل حاجه
والعكس علشان كده كانت اغاني فيلم عسل اسود بيتعبر عننا .. احنا كل حاجه والعكس ..
احنا المصريين .. ومصر أم الدنيا وأد الدنيا .. مصر أول وأهم كل حاجه في الدنيا..
وهنفضل نعلم الدنيا معنى الحضارة والتحضر والجمال والانسانية .. مصر جاءت أولا ثم
جاء التاريخ..
أقولها بكل فخر أنا المصري كريم العنصرين بنيت المجد بين الإهرمين .. جدودي أنشأوا
العلم العجيب .. ومجرى النيل في الوادي الخصيب .. لهم في الدنيا آلاف السنين .. ويفنى
الكون وهما موجودين ..

بقلم د. حماده العنتبلي